tecnoloxia.org | Tecnoloxía na Educación Secundaria

LEGO Digital Designer

13 Marzo 2008 by María L

Se botas de menos os robots LEGO Mindstorms estas vacacións podes descargar o software LEGO Digital Designer. Permíteche construír os teus propios modelos.

Pensade o que necesita o noso robot para superar a proba de rescate de robocampeones ( seguir unha liña negra no chan, detectar vítimas de cores, detectar e sortear obstáculos na liña, detectar o paso dunha habitación a outra, … ) e deseñade un robot cos sensores axeitados na posición correcta. A volta das vacacións probamos os robots e seguimos programándoos.

Pasádeo ben!

Subtitular vídeos

7 Marzo 2008 by María L

En internet atopamos interesantísimos vídeos de tecnoloxía útiles para as nosas clases, pero temos o problema de que a maioría están en inglés.

Hai unha solución: dotSUB. (Grazas Xano pola ligazón)

Trátase dun servizo colaborativo que permite a calquera adicionar lendas a vídeos na internet. Só hai que seleccionar un vídeo xa existente ou subir un e introducir os subtítulos, podendo utilizar unha lenda sincronizada xa existente como referencia, polo que non hai que preocuparse da sincronía e axustes nos textos.

Aquí tes un exemplo de vídeo subtitulado en galego sobre a licenza Creative Commons.

Pois nada, a ver se entre todos e todas facemos que vaia aumentando a cantidade de vídeos de tecnoloxía en galego na rede, polo menos subtitulados.

A enerxía dos teléfonos móbiles

3 Marzo 2008 by María L

móbil Vía Microsiervos atópome cun interesante artigo sobre aspectos enerxéticos dos teléfonos móbiles, no que atopamos os seguintes datos:

A enerxía consumida:

Segundo Nokia, o 70% do uso total de enerxía dun teléfono móbil lévase a cabo durante a fase de produción: a minería dos recursos, a produción dos compoñentes, a montaxe e o transporte. O 30% da enerxía consumida restante corresponde ás recargas da batería.

Durante a súa vida útil un teléfono móbil consume un promedio de 260 MJ. 180 MJ para a fabricación e 80 MJ na fase de utilización. (1MJ = 10⁶J)

Multiplica polo número de móbiles que tiveches e saberás canta enerxía levas gastada en falar por teléfono.

Aquí podes ver un vídeo da cadea de produción de telefonía móbil de Sony Ericsson:

Os residuos:

O 90% dos residuos tamén son xerados durante a fase de produción. As montañas de teléfonos móbiles en desuso como esta da foto non representan máis ca un 10% dos residuos. (Foto: Chris Jordan)

A transferencia de información:

Non só se consume enerxía ó cargar a batería. A transferencia dun gigabit de información a través de telefonía móbil (arredor de 500 minutos de chamadas) equivale a recorrer 200 km en coche.

Transmitir información pola rede de telefonía móbil require tres veces máis enerxía que pola rede de telefonía fixa.

En conclusión:

Se queremos unha opción ecolóxica, só hai unha opción: manter un mesmo teléfono móbil todo o tempo posible, e non cambialo por outro simplemente polas modas ou novidades.

prestacións

Difícil nolo poñen vista a rapidísima evolución destes trebellos en tan pouco tempo. Podes ver unha imaxe da evolución dos teléfonos móbiles de Nokia en 25 anos, e verás que a cousa non para.

kWh desglosados

2 Marzo 2008 by María L

A análise da factura eléctrica é un recurso bastante utilizado en clase, así que, ollo! a partir de abril o “recibo da luz” será diferente. A compañía eléctrica deberá indicar a orixe da electricidade vendida e o impacto ambiental provocado na súa xeración.

Orixe:
A enerxía eléctrica virá desglosada segundo as tecnoloxías utilizadas na súa xeración.

Impacto ambiental:
As empresas deberán incluír dous gráficos de barras, un de emisións e outro de residuos radioactivos, ordenados do “A” ao “G”, onde a primeira letra represente o mínimo impacto ambiental e a última, o máximo.

Parece que o impacto ambiental só se refire ás emisións e residuos. Para nada se teñen en conta outros tipos de impacto, pero algo é algo. A min paréceme un avance, pois temos dereito a esa información, pero non nos esquezamos do que nos repiten sempre en Sotavento: A enerxía máis limpa é a que non se consume.

Máis información no BOE.

Demasiado vento

26 Febreiro 2008 by María L

O día 22 deste mes ocorreu en Hornslet (Dinamarca) o que podes ver neste vídeo: un aeroxerador embalouse e acabou rompéndose en anacos.

[youtube: Løbsk vindmølle - wind turbine out of control]

Para que un aeroxerador funcione correctamente os ventos non deben superar os 100 km/h (o máximo rendemento prodúcese con ventos de entre 40 e 50 km/h). Cando a velocidade é excesiva, ou en caso dun mal funcionamento dalgún dos seus compoñentes, os sistemas de seguridade encárganse de frear o rotor e evitar o embalamento.

freo en punta de pa Os aeroxeradores contan con dous mecanismos de freo independentes para deter o rotor:

O sistema de freo aerodinámico ou freos en punta de pa é o sistema de freo primario dun aeroxerador. Consiste en facer xirar 90 graos a punta das pas, de xeito que se impide que o vento faga xirar o rotor, freándoo en cuestión dun par de voltas como moito.

O freo mecánico utilízase como apoio ó sistema de freo aerodinámico, como freo de estacionamento unha vez que a turbina está parada, cando se realizan labores de mantemento e tamén no caso de emerxencia, se o freo en punta de pa falla.
O freo mecánico sitúase no eixe pequeno, o que vai da multiplicadora ó xerador.
.