Blogue

Como podemos aforrar enerxía na nosa casa?
O primeiro que pensamos é en apagar as luces e aparellos electrónicos que non usamos, pero hai moitas cousas máis que podemos facer.

Proba xogar a Energuy, xogo da Axencia pola Eficacia Enerxética de Quebéc. Tes que conducir á personaxe pola súa casa e seleccionar aqueles elementos que podemos modificar para aforrar enerxía.
Ten paciencia, pois tarda un pouco en cargar.

Despois lémbrate de aplicar o mesmo no mundo real, e que non se quede isto nun xogo virtual.

(Visto en Tecnología Fuenteluna)

Como seguro que despois destas vacacións xa vos esquecestes das portas lóxicas, aquí van uns xogos para facer memoria. Atopeinos en tecnoTIC.

Grow the robot:

Debes conectar os fusibles nas portas lóxicas para proporcionar enerxía á cámara e facer que o robot medre. O número de fusibles é limitado, así que pensa ben onde colocalos para non desperdicialos. Se o robot non medra o suficiente non poderá defenderse ante as adversidades.

Grodbots:

Debes descargar o xogo (.jar) e logo guiar un robot ata un pastel para pasar de nivel. Nos primeiros niveis non necesitas portas lóxicas, senón que chega con unir cada cor coa acción correspondente. Máis adiante terás que utilizar diferentes portas lóxicas para programar o movemento do robot e conseguir que chegue ao seu obxectivo.
Tamén podes empregar un editor gráfico para deseñar o teu propio conxunto de niveis.

Gate:

A túa tarefa consiste en examinar distintas rexións de Marte cun robot dotado de propulsores para moverse e bumpers para detectar obstáculos. Debes deseñar os circuítos de control que permitan navegar por cada zona e alcanzar o obxectivo. Podes descargar o xogo para Mac ou para Windows.

Podes consultar aquí máis anotacións sobre electrónica dixital

Hoxe ponse en marcha de novo o Gran Colisor de Hadrones do CERN, que pretende facer chocar feixes de protóns. Podedes seguilo en directo aquí.

Ao chocar entre si, os protóns desintegraranse en partículas elementais, o que permitirá estudar:

• Cantas partículas totais hai no átomo. En Educación Secundaria estúdase que que os átomos están formados por protóns, neutróns e electróns, pero en realidade mirando máis ao fondo atopamos moitas partículas elementais (quarks, leptóns e bosóns).
• Que é a masa. Si, iso que tan acostumados estamos a tocar aínda non se sabe moi ben que é exactamente.
• Cal é a orixe da masa das partículas. A teoría dálle a responsable disto ao Bosón de Higgs, pero aínda faría falta comprobalo experimentalmente.
• Que é a materia escura. Sábese que existe, pero cos medios actuais non pode ser estudada. A ver se co LHC descúbrese algo máis.

Antes de poñer o LHC en marcha os científicos e enxeñeiros (e científicas e enxeñeiras) do CERN levan meses facendo probas nos sistemas de guiado dos feixes de protóns e nos sistemas de protección dos instrumentos.

¿Queredes facer estas probas?
En realidade non debe de ser tan sinxelo como nolo pintan neste simulador, pero válevos para ter unha idea do que están a facer alí.

Con este simulador podedes controlar algúns dos parámetros do LHC como a temperatura dos supercondutores, o campo electromagnético e a enerxía da colisión, que deben estar ben axustados para que o colisor funcione.

Probade con estes valores:

• Temperatura 1,9K
• Campo Magnético 8,4T
• Enerxía de colisión 14TeV

Despois de bloquear os valores dádelle a “run” e podedes ver as imaxes capturadas. Logo mediante as ferramentas (tools) podedes mirar se atopastes o bosón de Higgs.

Neste vídeo podes ver o que ocorre no interior do LHC:
Da botella ao Big Bang: A viaxe dun protón no LHC

[youtube: De la botella al Big Bang: El viaje de un protón en el LHC ]

(Información: microsiervos, Simulador: Electrónica Pascual)

Se remataches de estudar e gústache a música pasate polo xogo Pâte à Son.

Debes colocar os diferentes mecanismos que aparecen na parte inferior da páxina creando un circuíto para as pezas que aparecen polos laterais do taboleiro.
Cada un dos mecanismos ten unha función e xera un son, pero só se está ben colocado. Se sitúas o punteiro sobre algún deles aparecerán unhas frechas que che permitirán viralo.

Aquí tes o xogo: Pâte à Son

(Visto en Aula de Música)

Había unha vez un mundo habitado por robots. Un día aconteceu un grave accidente no xerador eléctrico principal. Ao quedarse sen subministro eléctrico o mundo caeu nun profundo sono, nada podía funcionar.
10.000 anos despois un raio carga de enerxía a un dos robots. Será capaz de conectar de novo o xerador e devolver a vida robótica ao seu mundo?

Aquí tes o xogo: Little Wheel

Nós non somos robots, pero imaxínaste como poderiamos vivir se non tivésemos subministro eléctrico? Podes deixar aquí a túa opinión.

A Estratexia Internacional para a Redución dos Desastres (EIRD), das Nacións Unidas ten coma obxectivo reducir o número de persoas mortas e feridas que causan os desastres provocados por perigos naturais propoñendo medios e medidas necesarias para reducir os efectos dos incendios, innundacións, tsunamis, furacáns, etc.

Mellorar as construcións, poñer barreiras naturais e artificiais, lexislar para non permitir construír en lugares de risco, protexer instalacións vitais e educar á poboación son algunhas das accións necesarias para preparar unha zona ante un posíbel desastre e minimizar o seu impacto.

Queres probar como xestionarías ti esta labor? Proba o xogo Alto aos desastres!

A túa misión consiste en planear e construír un entorno seguro nunha unha zona determinada do mapa. Debes avaliar os riscos e tomar as decisións necesarias para minimizar o impacto dun desastre sobre a poboación.

Sorte!

(Vía: @luis_en_transit)