Blogue

Quen non se puxo algunha vez dos nervos por non atopar o comezo da cinta adhesiva?

Zhichuan Tang propón unha sinxela solución: Un corte en V e xa está. Non precisamos tesoiras para cortar e sempre teremos o comezo a man.

Eu faríalle dous ou tres cortes en V para que non quedasen os anacos de cinta tan longos, pero a idea é moi boa. Tan simple e a ninguén se lle ocorreu ata agora.

(Visto en noquedanblogs.com)

Entre os maiores problemas que teñen os trens de alta velocidade atopamos a demora producida nas paradas intermedias que alongan o tempo da viaxe e o gasto enerxético na deceleración e aceleración do tren en cada estación.

Co fin de reducir o tempo e o gasto enerxético, o deseñador chinés Chen Jianjun presenta unha solución enxeñosa: que o tren non se deteña. A idea é introducir unhas cabinas que se acoplan e desacoplan ao tren cada vez que pasa por unha estación.

Cando chegas á estación hai que subirse a unha cabina. No intre en que o tren pasa pola estación a cabina previamente acelerada acoplarase ao tren e tranquilamente os pasaxeiros poderán ir acomodándose no interior.

Para baixarse do tren hai que subirse na cabina que leva acoplada, e cando pasa pola estación só ten que desenganchala para que os pasaxeiros baixen dela.

[youtube: The train that never stops at a station]

En resumo, cada vez que o tren pasa por unha estación solta unha cabina cos pasaxeiros que queren baixar e recolle outra cos que queren subir, e dese xeito o tren nunca para, aforrando tempo e enerxía.

Calcúlase que con este sistema o tren que une Pekín con Guangzhou, separadas 2.475 kilómetros e con 30 paradas intermedias, reduciría dúas horas e media o seu percorrido.

(Vía: un correo do meu pai)

Aproveitando as vacacións e que o tempo está de chuvia e vento, que tal construír unha lámpada con cousas atopadas na casa?


O deseño da imaxe é de David Olschewski, e resulta moi doado de reproducir cunhas pinzas da roupa, un pouco de cola branca e os compoñentes eléctricos. Esta é unha lámpada de mesa, pero poderíase facer igualmente unha de teito, utilizar pinzas de plástico de cores ou crear unha con outros materiais.

E se che fai falta un colgadoiro, aquí tes un ben simple:

E xa que estamos coa simplicidade, non te perdas este organizador de cables:

Cando estudamos os mecanismos transmisores e transformadores do movemento soemos poñer exemplos de utilización en máquinas e dispositivos de uso común, pero pódense utilizar tamén con fins decorativos e non funcionais, potenciando a súa beleza intrínseca.

Mira este deseño de kinektdesign. A min paréceme moi orixinal.

Aquí hai un vídeo co anel en acción:

[youtube: Kinekt Design's Gear Ring]

(Visto en swiss-miss.com)

Os disquetes sons eses dispositivos de almacenamento de datos que utilizábamos hai anos e que xa son tecnoloxía obsoleta.
Moita xente xa os tirou hai tempo ao lixo, pero se aínda tes disquetes na casa aí van unhas ideas de reutilización:

[Slideshow: Reciclando disquetes]

Se che gusta pintar, podes utilizalos como soporte para as túas obras, como fai o artista Nick Gentry

[Slideshow: Nick Gentry]

E qué che parece reutilizar cassettes?

Conectando de xeito imaxinativo elementos de fontanería e electricidade podemos construír lámpadas do máis orixinal, como fai o deseñador croata Robert Matysiak.

[Slide: Robolámpadas]

Anímaste a facer unha lámpada destas para a túa casa?

Necesitas unha lámpada (mellor de baixo consumo), un portalámpadas, un interruptor, un enchufe, cable paralelo, … e calquera material usado con imaxinación, se é reciclado mellor.
Para evitar despistes con algún cable solto, mellor usa un material illante para a estrutura.

Poden interesarte tamén estas lámpadas con tubarías e billas.

(visto en gizmodo.com)