Blogue

O venres e o luns iremos visitar a factoría PSA-Peugeot-Citroën en Vigo. Para ir preparándonos para o que imos ver temos o seguinte material:

O proceso:

Na páxina de PSA-Peugeot-Citroën temos estupenda animación do proceso de fabricación, no que se ve:

• embutición: a partir de chapa galvanizada fanse as distintas pezas da carrocería
• soldadura: ensamblado e conformación das pezas mediante robots soldadores
• pintura: realízase mediante robots, pero nós non imos ver esta parte
• montaxe: colócanse a portas, taboleiro de mandos, asentos, parabrisas, rodas, motor, etc.
• e o control de calidade final.

Clica na imaxe para ver a animación flash.

Vídeos:

Como isto non é máis ca unha animación, cómpre ver tamén uns vídeos do proceso

Robots industriais:

Teñen tamén unha animación do funcionamento dos robots industriais utilizados na fábrica.

·

Consignas de seguridade para a visita:

• Deben vir calzados con calzado deportivo ou zapatos de punta redonda.
• Non se permite a entrada ao centro con mochilas, así que deberán deixalas no autobús.
• Antes de comezar a visita, entregaranse unhas batas, zapatos ou punteiras de seguridade e lentes de seguridade.
• Todo o material deberá ser devolto unha vez finalizada a visita.
• Nos talleres hai marcadas no chan uns camiños peonís, que deberán ser utilizados pola visita, xa que os corredores son estreitos e utilízanos para fornecer material ás liñas de fabricación.
• Durante o percorrido pasarase por corredores por os que cruzan vehículos, así que se debe ir moi atento.
• A visita deberá ir agrupada; é dicir, non deberá quedar xente atrasada nin disgregada do grupo principal.
• No percorrido realizaranse varias paradas para ver operacións concretas do proceso de fabricación dun automóbil. Nestas paradas, os visitantes deberán agruparse seguindo as indicacións, con coidado de non invadir os corredores, para poder escoitar as explicacións que dará a azafata.
• En caso de incumprimento reiterado da normativa de seguridade, a azafata está autorizada para dar por finalizada a visita, aínda que non se remate o percorrido previsto.

Coma no 2009, este curso o alumnado de 2º de ESO tamén asistiu ao Obradoiro Enxeño que organiza a ETSE de Telecomunicación da Universidade de Vigo.

Os rapaces e rapazas tiveron que montar os sensores dun robot Lego e programalo para que realizase algunhas accións en resposta ás condicións do entorno.

Aquí tedes o vídeo da actividade:

[Obradoiro de Robótica Enxeño 2010 from María L on Vimeo.]

En 4º de ESO comezaremos a traballar dentro de pouco cos robots, pero con desafíos nos que tedes que rompervos máis a cabeza. Ídevos preparando.

(Música do vídeo: Pump Up The Jam. The Lost Fingers)

Se queredes saber de forma visual e rápida como evolucionou Internet recoméndovos esta animación flash de Discovery Chanel: Internet.

Seleccionamos na ruleta a década que queremos ver e premendo nas flechas do teclado imos avanzando no tempo e vendo os acontecementos máis importantes de Internet.

Aparecen curiosidades. Por exemplo, a primeira mensaxe que se intentou enviar a través da rede en 1969 foi a palabra “login”. O “l” e o “o” chegaron ao seu destino, pero o sistema colapsouse ao chegar ao “g”. Comparádeo cos millóns de datos que circulan hoxe en día pola rede.

Feliz viaxe no tempo!

(Visto en villaves56)

Sempre recomendo usar Open Office, pero máis dunha vez chega alguén cun traballo feito na casa en formato .docx de Microsoft Office 2007 e non pode abrilo.

Pódese solucionar con este conversor de .docx a .doc

Non precisa rexistro, nin dar o noso e-mail, nin nada. Só hai que subir o arquivo .docx, darlle a converter e Listo!

History of the World é un recurso realizado pola BBC e o Museo Británico que se centra na historia do mundo a través dos obxectos que fabricamos, dende as primeiras ferramentas de pedra ata a telefonía móbil. Os obxectos son os que se atopan nos museos británicos, así que podemos botar en falta moitas cousas.

Mediante unha aplicación flash podemos acceder aos diferentes obxectos segundo a súa época. Clicando no que nos interese accedemos a máis información, fotos e vídeos.

Tamén podemos buscar obxectos por temas (por exemplo, ciencia e tecnoloxía), cultura, material de fabricación, cor, etc.

Agora que andamos a voltas coa electrónica dixital en 2º de Bacharelato, pásovos unhas aplicacións que vos poden axudar.

Karnaugh Map 1.2 é unha sinxela aplicación para simplificar funcións lóxicas por Karnaugh. Tedes que introducir os valores da saída na táboa de verdade e o programa dános a función simplificada. (funciona para windows XP)

Algo máis completo é Boole-Deusto, xa que ademais de simplificar a función a partir da táboa de verdade dános o circuíto lóxico e a implementación con portas NAND e NOR. Resulta algo farragoso traballar con el, pero temos as solucións completas dos exercicios (sempre e cando a táboa de verdade estea ben feita, claro)

Para obter a función lóxica dun circuíto dixital hai unha aplicación online moi sinxela: Logic Circuit Test. Só hai que dibuxar o circuíto, e xa temos a táboa de verdade correspondente.

Para simular circuítos podemos utilizar moitas aplicacións, como o crocodile technology, que xa coñecedes, ou o Electronics Workbench.

Se os circuítos son sinxelos e non queremos complicarnos podemos recorrer a simuladores online.

The Logic Lab é un vistoso simulador online moi doado de manexar. Permite gardar os circuítos para seguir editándoos.

Tamén podedes probar Logicly.

Tamén hai simuladores de construción real de circuítos. A verdade que a min dáme máis traballo simular a construción que construír o circuíto nunha protoboard, pero por se a alguén lle interesa existe unha aplicación que simula unha protoboard coas súas entradas e saídas e onde conectamos as portas lóxicas reais: Simulador TTL con Escenarios
Tamén podemos descargar un titorial e varios circuítos de exemplo.

Todo isto é para axudaros a entender as cousas, pero lembrade que a selectividade e as probas de acceso a ciclos fanse aínda con papel e boli, así que non deixedes de practicar coa clásica ferramenta de escritura.

Podes ver aquí máis anotacións sobre electrónica dixital